- 61 -

1450. September 6.

Ich Nicolaus Lynz von Glowatschaw die czeit obirster Schreiber des Irlauchten fursten vnd herrn Herczog Conraden Herczog in Slezien zcur Olssen vnd Kozil etc. Bekenne offintlich mit dezim briue vor allen die en sehen horen adir lezen, das mir der Wirdige herre Nicolaus Aptt des Clostirs zum Rauden von seyner vnd seynis Closters vnd zamnunge wegen gancz vnd gar hundirt marg grosschen Bemischer muncze vnd Polnischer czal von wegin der czehen marg groschen czins die ich en In vnd vff dem obirsten gerichte zcu Matiskirche noch ynnehaldunge meyner furstlichen briue, die ich en ouch geanttwirt habe, vff eynen hawffen beczalt hot wolzcudancke, Vnd dorumbe zo sage ich vtczunt vnd qweite den obingnanten hern Nicolaum Apt vnd seyne nochkomende Apte des Clostirs mit der zamnunge doselbest der obingnanten hundirt marg gancz los vnd ledig vnd qweitte sie allezampt mit crafft dies meynis briues vnd glowbe von meyner vnd allir meyner frunde wegen In noch sie nu noch zcu ewigen czeiten dorumbe anzculangen noch anzcusprechen mit geistlichen vnd wertlichin gerichten. Des zcu eynem bekentnis habe ich meyn Segil an dezen brieff gehangen. Gegebin zcur Kozil am Sontage vor vnsir lieben frawentage Natiuitatis Noch gottis geburt vierczenhundirt vnd donoch yn dem fumffczigsten yoren.

Mit anhangendem Siegel, welches das Vordertheil eines Hirsches zeigt, mit der Umschrift; sigillum, mcolaus. linse.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 2, Urkunden der Klöster Rauden und Himmelwitz, der Dominicaner und Dominicanerinnen in der Stadt Ratibor. Hrsg von dr. W. Wattenbach, Breslau 1859.